I dîs de civuite

autôr Manuela Rossi
date 3 Març 2017

Cualchi timp indaûr o jeri daûr a tornâ cjase sot sere, in chel moment precîs de zornade, subit dopo che il soreli al è lât a mont, li che dutis lis robis (arbui, cjasis, monts...) a pierdin la lôr fate tridimensionâl e si trasformin in profîi neris suntun fonts celest intens. Propit in chel moment, daûr di me, o ai olmât une forme che di un pâl de alte tension e leve jù cuasi fin par tiere, par dopo movisi in bande e tornâ a lâ sù sul fumarûl di une cjase dongje. O ai alçât i voi e o ai capît dal moment cui che e jere chê presince misteriose: une civuite.

La civuite e je une specie avonde presinte tai ambients agricui ancje une vore antropizâts: si è usade in cualchi maniere a convivi cu la presince dal om doprant vieris manufats tant che nît o ripâr. Ma a son ancjemò criticitâts in cheste convivence: prin di dut il trafic veicolâr, ma ancje i invelenaments e i impats cun cablis e veris.

In chest moment dal an al è avonde facil sintîle cjantâ di sere. Ogni volte che mi sucêt di scoltâ il so sgnauleç carateristic no pues fâ di mancul di lâ fûr e di cirî tra i cuvierts li dongje la sô sacume taronde. O sai che par tancj chest cjant al dismôf sensazions brutis leadis a premonizions scuris, e di chest mi displâs une vore, stant che chestis cjacaris in realtât si fondin su spiegazions cetant pratichis. Dut al è nassût secui indaûr cuant che, in mancjance di lûs eletrichis, lis gnots intes piçulis vilis a jerin tant scuris. Lis unichis ocasions sfortunadis là che lis personis a restavin sù vie pe gnot a jerin chês des veglis a cui che al jere daûr a murî. In chescj moments, lis lûs dai lums piâts a filtravin pai barcons clamant dongje tantis paveis di gnot, e chestis a tiravin dongje lis civuitis, riclamadis di un pussibil ghiringhel. In chês ocasions al sucedeve che cualchi civuite e fasès sintî la sô vôs, e di culì e ven la cjacare che il cjant de civuite al sedi segnâl di muart.

In efiets, inte leterature e inte tradizion lis civuitis a son figuris ambivalentis. In cualchi câs a son simbul di savietât e di fortune. Altris voltis a son metudis dongje ae sfortune o leadis a figuris negativis tant che lis striis (in chest sens, ancje la tassonomie no ur zuie a pro: a son part dal grup dai strigjiformis, ven a stâi "che a àn forme di strie").

Ai 11 di Març e sarà la “Gnot de Civuite”, un event bienâl là che in dute Europe associazions di ornitolics e specialiscj a organizin seradis divulgativis par fâ cognossi la biologjie di civuitis e di altris rapaçs noturnis. Une ocasion par dineâ mîts fals e par preseâ l'inmagant adatament ae vite noturne di chescj animâi. Se no varês ocasion di partecipâ a cualchi serade a teme, o podarês dut câs lâ te campagne a fâ doi pas, daspò che il soreli al è lât a mont, par sintî il lôr cjant (cierts di no intivâsi in cualsisedi disgracie).