L'architet mascarât

autôr Manuela Rossi
date 24 Març 2017
dissiplinis Biologjie / Ecologjie / Zoologjie

Il mont animâl che o vin dulintor di nô, juste fûr de puarte di cjase, al è simpri plen di sorpresis. No sai a trops di voaltris che ur sedi capitât di viodilu e pûr, se no vivês masse distants de campagne, il protagonist di vuê dal sigûr al varà talpetât vie pe gnot pôc lontan dai vuestris barcons.

Il tac european (Meles meles) al è un animâl pardabon curiôs. Par vie dal so caratar un pôc straneôs nol sucêt tant dispès di viodilu, e pûr des nestris bandis al è, insiemi cu la bolp, il carnivar plui presint (carnivar in sens tassonomic, in realtât al à guscj alimentârs avonde svariâts...).

Al è un architet rafinât; di fat al destine une vore di timp a sistemâ e a netâ in maniere meticolose la sô cove, e al è impegnât dispès in progjets di ampliament. Ciertis covis a puedin vê ancje un centenâr di agns, stant che a son ocupadis di diviersis gjenerazions.

La cove plui grande in assolût che e je stade cjatade e veve 130 jentradis e 50 stanziis, par un totâl di cuasi un chilometri di galariis. In cheste regje soteranie a jerin a stâ une ventine di tacs (o sin daûr a fevelâ di Guinnes dai primâts, di norme lis costruzions a son plui modestis!). Cundut che no si puedin definî animâi sociâi (si movin e a cjacin prin di dut bessôi), al è interessant cemût che chescj mustelidis a condividin i lôr ripârs cence barufâsi. Intal stes timp però, il rivâ di un tac estrani al sarès refudât cun fuarce. Cuâl isal alore l’element discriminatîf? Cui puedial jentrâ e cui no? Ogni cjase e à il so odôr (lu podìn dî ancje des nestris cjasis: cui no si visial dal odôr de cjase de none?!), e la stesse robe e vâl pes covis dai tacs. Ogni singul animâl, di là dal so odôr tipic, individuâl, al cjape sù cul timp chel de cove che al frecuente; chest odôr al devente pardabon une marche olfative pai condomins. Un tac che al reste masse a dilunc lontan di cjase al è in pericul di pierdi l'“odôr dal clan” e di jessi parat fûr cuant che al torne dongje.

Lis covis, in cualchi câs, a puedin trasformâsi ancje in “condominis multietnics”: al è stât verificât che la bolp rosse e aprofite, in cualchi câs, di une part de cove dal tac. Plui che une convivence, in chest câs e je une tolerance mutualistiche: di une bande la bolp e pues aprofitâ di une pulizie costante de abitazion, di chê altre il tac al rive a scrocâ ogni tant cualchi vanzum de mangjative puartade te cove (in pratiche la storie de mê vite di apartament, cuant che o jeri ae universitât).

Aromai e je la Vierte, e intal intric di cjamaris e galariis, in chestis setemanis, a son nassûts i prins piçui tacs: a son come luianiutis, ducj spilucâts e grancj tant che une pantiane, che intal zîr di pocjis setemanis a somearan “bandîts” ninins e taronduts, cui voi mascarâts. Jessint animâi monogams, i gjenitôrs, di an in an, a curin la fiolance cun grande cure e atenzion, fiolance che e reste cun lôr fin ae Sierade daspò. Cheste stabilitât familiâr aparente e je vuastade però di moroseçs segrets. Al pâr che, in chestis cubiis consolidadis, la fedeltât dal mascli e sedi cierte, intant che la mascje e je solite intratignîsi ancje cun tacs “vedrans” che a frecuentin la zone. Analisis gjenetichis a àn mostrât, di fat, che plui o mancul la metât dai piçui parturîts di une singule mascje no son fîs dal propri compagn “uficiâl”. Cemût che si use dî: Mater semper certa est, pater numquam!!!