Piçule vuide pal no socors

autôr Manuela Rossi
date 14 Avrîl 2017
dissiplinis Biologjie / Etologjie / Zoologjie

Se, tant che mi sucêt a mi, o patîs di un istint che no podês stratignî e che us puarte a volê socori ogni singul animâl che al pâr in dificoltât, o volarès dâus cualchi piçul consei, che jo stesse o varès volût vê cualchi desene di agns indaûr e che mi varès permetût di sconzurâ une vore di piçui dramis domestics.

Trops di voaltris, devant di un piçul ucielut par tiere o di jeuruts bessôi e plens di frêt, no àno il desideri fuart di cjapâju e puartâju tal sigûr? Il nestri prin pinsîr al è che a sedin stâts abandonâts o che a vedin pierdût i gjenitôrs e o volìn cjapâ il lôr puest, cence imagjinâ nancje par dongje che il nestri intervent al sedi, cun grande probabilitât, une condane a muart pai disgraciâts.

Intal gno câs, o ai une tentazion fuarte di dâ la colpe di chest gno imprinting di infermiere/sassine dal mont animâl al siôr Morandi Gianni. Jenfri i vinîi che a sunavin in cjase cuant che o jeri frute, un, par colpe mê, al veve une riadure di fruie dome suntune cjançon. Chest toc al jere “Sei forte papà”.

Par cui che nol ves mai sintût cheste cjançon comovente, o ripuarti dome l'incipit: “Gli animali non hanno ombrello e non portano mai il cappello, piove tanto e si sono bagnati, sono già tutti raffreddati, che si fa? Chi li aiuterà?…”. Di chi e tache la storie comovente di un pari sometût, costret a socori animâi bisugnôs (o miôr, crodûts bisugnôs) sot de pression urgjente dai fîs.

Dut al nas dal fat che par cualchi specie animâl, a diference de nestre, inte corse evolutive al è stât un compuartament vincidôr lassâ i piçui di bessôi pe plui part dal timp e tornâ cun lôr dome tal moment necessari ae nutrizion. Chest al è il câs di tancj mamifars, tant che il cjavrûl, il cierf o il jeur. I adults, jessint in maniere potenziâl predis, a cirin di no atirâ la atenzion dai predadôrs in direzion dal piçul, cence difesis. Duncje, se o cjatìn tra la jerbe o intal sotbosc un ciervut o un jeurut che no si môf, visìnsi che si cjate li parcè che il so istint i dîs di stâ fer e di spietâ la mame che e tornarà tal moment dal gustâ. In maniere assolude, no vin di interferî cun lôr (tocjâju, moviju, puartâur mangjative), parcè che il nestri odôr al metarès in suspiet la mari cuant che e torne, e propit in chel câs e podarès pardabon decidi di abandonâju.

Par chel che invezit al tocje il mont dai uciei si à di fâ une distinzion, prime di decidi se intervignî o mancul. Tes fasis di cressite di une vore di uciei a ’nd è une che e previôt une “fermade” par tiere: il piçul, za cuviert di plumis (mierlis e altris passeriformis) o di un plumin fis (rapaçs noturnis) ma no ancjemò autonom intal svol, al ven lassât dai gjenitôrs par tiere o suntun ramaç, lontan dal nît, intant che lôr si interessin di cjatâ la mangjative. Ancje in chest câs, nol è stât gran abandonât e nol va mai racuelt o movût, fûr che nol sedi intune cundizion di pericul (li ator magari al è un felin dumiesti o l’uciel al è sul cei di une strade): in chel câs o podìn limitâsi a movilu intun lûc plui sigûr e dongje (ven a stâi, simpri dentri dai 50 metris); al sarà lui stes a segnalâ la sô posizion ai gjenitôrs, piulant.

Un altri câs invezit al sarès se si cjatassin denant di un poleçut cence o cun pocjis plumis e cui voi ancjemò sierâts. Prime di dut, o vin di individuâ li ator il nît di li che, in efiets, al podarès jessi colât, e cirî di tornâ a metilu dentri. Intal câs che chest no si podès fâ, o vin di jessi cussients che lis pussibilitâts di salvece dal piçul a son in realtât une vore pocjis.

Dopo, un câs particolâr a son i piçui di rondon. Chescj uciei a passin la lôr vite in svol e i gjenitôrs no rivin a dâi di mangjâ a un piçul colât parcè che no puedin poiâsi par tiere. In chest câs, o varessin di intervignî e di racuei l’animâl ancje se al à un implum complet. Infin, par ce che al tocje i adults, l'intervent di “salvament” di un cualsisedi animâl si pues fâ dome intal câs che si cjatisi devant di esemplârs ferîts o che a son intun stât di salût che al è critic in maniere evidente. In linie gjenerâl, al è impuartant savê che par cierts di lôr la tension causade de cature e podarès jessi plui fatâl dal traume che par chel o sin daûr a socoriju.

Une altre situazion ancjemò e je chê che e tocje i incidents stradâi là che a son cjapâts dentri animâi. Al è ben visâsi une robe che forsit no ducj a san: al esist simpri l'oblic di socors, intal câs là che si cjapi sot un animâl di afezion, di redit o protet (dute la faune omeoterme, ven a stâi cul sanc cjalt). Atenzion parcè che il mancjât socors al è un reât aministratîf che al vâl sedi par cui che al à causionât l'incident, sedi par cui che al cjate dilunc de strade un animâl ferît ancje cence jessi l'autôr dal incident stes (come 9-bis dal art. 189 dal Codiç de Strade).

Cemût compuartâsi duncje se o vessin di intervignî in chest câs? Tant che prime robe al è ben valutâ la pericolositât de situazion: i animâi a puedin jessi imprevedibii e reagjî ancje in maniere agressive, cundut che o vedin lis nestris buinis intenzions. No stin mai a metisi in cundizions di pericul, massime cun animâi di gruesse taie, e intal câs che o ’nt cjatassin un, clamìn lis fuarcis dal ordin. Se invezit la situazion e ven valutade cence pericui par nô, prime di dut o podìn meti la besteute intune scjate di carton sbusade, pal traspuart (intal câs di animâi sgjavadôrs, miôr alc di plui resistent), e contatâ un CRAS (Centris Recupar Animâi Salvadis) convenzionât dentri di 24 oris (o ricuardìn che pe leç taliane al è improibît vê faune salvadie e chest compuartament al pese a nivel penâl). La cure de besteute alore e vignarà lassade a cui che al è plui espert di nô e al à i mieçs par une cure otimâl. Chest al podarà ancje evitâ traumis ai vuestris fîs, che no varan di assisti ae muart probabile dal animâl par cause des vuestris curis o ancje dome dilunc de sô degjence in cjase vuestre.

Intal colegament chi sot o cjatais i riferiments pe nestre regjon e par dute Italie http://www.recuperoselvatici.it/elenco.htm

P.S. Al siôr Morandi Gianni e a chei altris paris cul cûr dolç, o volarès ricuardâ che i animâi no àn ombrene e nancje cjapiel parcè che a son adatâts dal dut sedi al soreli che ae ploie; si domande duncje di resisti aes pressions fuartonis dai fîs e di no gjavâ dal so ambient naturâl nissun animâl intant che al è un temporâl!