Sgjavâ e mangjâ di buinore a sere

autôr Manuela Rossi
date 10 Fevrâr 2017

In chest gnûf an mi plasarès dedicâmi, di là des contis sui lûcs di visitâ, ancje aes piçulis storiis di personis, plantis e animâi di chest teritori che, ancje se in aparence banâi, a scuindin aspiets curiôs, stramps e cualchi volte inspietâts. Tra lis tantis besteutis che a vivin tal nestri teritori e che da râr o degnìn di une cjalade (in chest câs viodilu al è cuasi impussibil), o ai sielt di contâ cualchi curiositât sul farc.

Mi è vignût iniment par vie che, no tant timp fa, mi soi cjatade a fevelâ cun Bepi (o doprarai un pseudonim, mi è stât domandât un anonimât rigorôs). Bepi al podarès jessi un cualsisedi furlan su la sessantine che di frut al è cressût tra fossâi, fen e fîcs robâts. O jeri intal so zardin e intant che mi fevelave al steve cul pît plantât su la svangje e il comedon poiât sul mani di len. Tal principi no i ai pensât, ma dopo mi à someât strani viodilu cun chel imprest parcè che no jere tiere di movi e nancje no jere stagjon di ort... cussì i ai domandât ce che al jere daûr a fâ e lui mi à rispuindût... “i sei in spiete dal farc” (o ben, al jere daûr a fâi la vuaite).

Par un furlan che al à cure in maniere precise dal so zardin o che al viôt cun perizie ossessive dal so ortut, il farc al rapresente un antagonist primordiâl. Tra i doi al partìs un zûc di tension là che un nol viôt chel altri, ma ducj i doi a son cierts de presince di un e di chel altri.

Dut al scomence cuntune vibrazion lizere, un rumôr sort che al ven dal bas e intun lamp il prât al scomence a sbalçâ, a deformâsi, une colade di tiere si alce tun moment, lapii di lidrîs a colin dongje dal coni gropolôs... dut al sucêt cussì ae svelte che il Bepi di turni nol à il timp di plantâ dentri la svangje intal pont just e rivâ, cuntune palade chirurgjiche, a puartâ difûr l'autôr di cheste eruzion di tiere.

I grums cognossûts che a tradissin la presince dal farc a son il materiâl di risulte des galariis sgjavadis sot tiere cu lis talpis anteriôrs robustis. Chescj tunei soteranis, se a son a cualchi desene di centimetris dal nivel dal teren, a àn une funzion di ripâr continui o, se plui superficiâi, a son sgjavâts par cirî robe di mangjâ.

Al è odeât intai orts parcè che al è acusât di nudrîsi des lidrîs di salate, di lidric e di altri. In realtât, il dam che al cause al è dal dut involontari: lui al dispresee lis verduris tant che un cualsisedi adolessent uman, ma la sô ativitât di ricercje di viers e di insets no pues jessi dal sigûr fermade di une cualsisedi carote impirade intal teren che e incrose il so sgjâf.

Par une cundizion strambe determinade dal so metabolisim, il farc al è costret a mangjâ di un continui, nol à la capacitât di meti dongje risierve in forme di gras. Par chest motîf, si concêt dome durmidis curtis tra une mirinde e chê altre, e nol pues permetisi un moment di letarc dilunc de stagjon frede. Par morestâ cheste ansie costante de mangjative, il farc al prepare dispensis fatis di un berdei di viers che al pâr che al rivi, cun muardudis ben sestadis, a paralizâ par conservâju vîfs – e duncje frescs – a dilunc. Ma - tignît ben a ments ben - no masse a dilunc, parcè che i viers a puedin rigjenerâ part dal lôr sisteme gnervin (se nol è masse comprometût) e scjampâ de presonie.

Par cierts, il farc al podarès someâ une surîs scure cicinose: in realtât nol è un roseadôr, al è invezit dal ordin dai insetivars, tant che i riçs e i musans.

Al passe dute la vite intai meandris soteranis des sôs galariis, lant fûr te lûs dome intal câs di inagaments; in chest câs, lis sôs talpis sgjavadoris si trasformin in orghins propulsôrs ecelents par nadâ.

La sô pelice e je, par gno cont, une opare mestre dal adatament: là che ducj i mamifars a àn une direzion intal pêl, che al va dal cjâf in direzion de code, il pêl dal farc al è cence cheste carateristiche e al va daûr de direzion di moviment dal animâl dentri des sôs galariis. Cheste carateristiche e fâs deventâ la pelice dal farc une vore fofe, tant che une volte e jere doprade par fâ gjachetis, mantei o parts di vistîts. Si pues propit dî che la vite dal farc no je mai facile cuant che l'om al è des sôs bandis