Sponts (…e spudadis) di Mai

autôr Manuela Rossi
date 12 Mai 2017

Se il timp lu permet, Mai al è il mês des primis cjaminadis tal viert. Il mont che si vierç devant dai nestris voi al somee che al sclopi di energjie: dut al è daûr a scomençâ, dapardut li che si voltisi si cjapin ispirazions par osservazions naturalistichis interessantis.

La comunitât ornitologjiche e je cuasi complete, i ultins migradôrs si nicin a tornâ dongje dai lôr cuartîrs invernâi, e dentri de fin dal mês ancje i rondons plui tardîfs a saran tornâts tai nestris cîi. I arbui verts di fueis in chescj dîs a àn abandonât, pal moment, lis lôr mudis solitis par cuvierzisi di rosis dutis blancjis – o feveli de robinie e dal saût, che insiemi cu la albespine a jemplin di profum lis nestris campagnis -. Tal mês di Mai si vierzin ancje lis orchideis, tant che la Cephalanthera cu la sô infloressence cjandide e, inte miezeombre dal bosc, la Dactylorhiza maculata, che si ricognòs pes rosis tes tonalitâts dal viole disponudis a spi, e des fueis carateristichis cun maglis scuris evidentis.

Us imagjini cussì, a gjoldisi une cjaminade pacjifiche, cjareçant cu la ponte dai dêts la jerbe profumade dai prâts te Vierte, intun idili degn di un reclam di biscots integrâi… Ma ve, dut un colp, la note stonade… Une sensazion bagnadice sui braçs e su lis gjambis scuviertis pe prime volte al soreli… Orôr! Si rindarês cont di jessi plens di spudacjs, dapardut tor di voaltris si viodin grumuts di sbrume sui fros des plantis, o sês cussients che di chel prât no larês fûr cence jessi atacâts di altre bave.

Passât il sens di stomi iniziâl, al è timp di disvelâ il misteri. O sês stâts somerzûts di “spudacj di cuc”, al è cussì che al ven clamât in tantis bandis di Italie, ma cun chest uciel la sostance e à pôc a ce fâ. In realtât, la responsabile e je la ruie di un inset: par talian la sputacchina (il non al da dongje diviersis speciis, chê plui comune e je Philaenus spumarius). Chest inset al è dal sotordin dai omotars, imparintât a strent cu lis cialis.

Lis Philaenus spumarius zovinis a produsin, vie pe Vierte, cheste sbrume blancje (che si cjate cun facilitât su ciertis plantis tant che la salvie dai prâts) fasint passâ pe part terminâl dal lôr adom i scarts licuits, origjinâts de linfe de plante li che a si nudrissin, e che lôr no rivin a digjerî ben. Chescj “escrements montâts a nêf” a produsin bufulis avonde stabilis che a rivin a resisti ancje ae ploie lizere. La sbrume e fâs une funzion impuartante di protezion par vie che e plate l'inset, tal so stadi larvâl, ae viste dai predadôrs e tal stes timp lu protêç de disidratazion. Di fat, ancje in situazions di tant soreli, la masse plene di sbrume e manten la umiditât relative avonde alte, e nivei di temperadure sopuartabii pal animâl.

Duncje stait pacjifics, lait indevant cu la vuestre imersion intal vert de Vierte, nissun nol à spudât prime dal vuestri passaç (in ogni câs no soi dal dut sigure che si sintedis confuartâts dal fat di vê vût invezit contat cui escrements modificâts di un inset…).

Di adulte, la Philaenus spumarius e somee un pôc a un piçul coleotar, ma lis alis a son inclinadis, come pes cialis… O disarès che, cun buine aprossimazion, e à la forme di un gianduiotto cun voi une vore grancj. Us sarà sucedût dal sigûr di cjatânt cualchidune e us varà dal sigûr maraveât pai salts straordenaris che e je buine di fâ.

E je une saltadore ecezionâl, che in cont di prestazions e passe la pulç che e je za mitiche. Lis sôs talpis posteriôrs no son dut câs masse lungjis, cemût che si podarès spietâsi: un studi publicât su Nature intal 2003 al à dimostrât che il mecanisim ae fonde di chescj salts al è dal dut simil a chel de catapulte; i articui inferiôrs a àn propit sistemis a dincj che a funzionin tant che ingranaçs in stât di cjariâsi e po dopo diliberâ la energjie intune sburtade potente. Cundut che e sedi lungje a pene sîs milimetris, e je in stât di saltâ fin a 70 centimetris di altece: par dâ miôr la idee, al è come se un uman intun unic salt al rivàs ae piche di un gratecîl di 200 metris.

Mi fâs plasê lassâus cun chest ricuart un pôc plui “onorevul” di cheste besteute curiose, ma al prossim “spudacj di cuc” che o cjatarìn visìnsi che chê masse di sbrume pe Philaenus spumarius e je stade, fûr di ogni dubi, une sielte vincidore inte sô corse evolutive!

O dismenteavi, o vin fevelât di fals spudacjs di cuc, ma par dî la veretât, o vin di confermâ la esistence ancje dai vêrs “spudacjs” di chest uciel. L'adult al è un dai pôcs animâi in stât di nudrîsi di ruiis di processionarie (che a son rivistidis di pêi une vore iritants, che di chei però il nestri amì di plume nol somee preocupâsi). In realtât, chescj pêi si ingrumin intal stomi e in maniere periodiche l’animâl si libare di lôr mandant fûr un rivoc (un laniç) che ju conten insiemi cun altris parts duris di invertebrâts!