Storiis

La setemane passade, aprofitant des bielis seradis ancjemò di lûs che cheste stagjon nus regale, si jere li a fevelâ fûr di cjase; i gjats dal curtîl a jerin stravuacâts panze par aiar, cence pudôr, par provâ a cirî un tic di fresc, e i grîs a intonavin cun fadie cualchi note sclendare tal scjafoiaç.

I dîs de civuite

Cualchi timp indaûr o jeri daûr a tornâ cjase sot sere, in chel moment precîs de zornade, subit dopo che il soreli al è lât a mont, li che dutis lis robis (arbui, cjasis, monts...) a pierdin la lôr fate tridimensionâl e si trasformin in profîi neris suntun fonts celest intens. Propit in chel moment, daûr di me, o ai olmât une forme che di un pâl de alte tension e leve jù cuasi fin par tiere, par dopo movisi in bande e tornâ a lâ sù sul fumarûl di une cjase dongje. O ai alçât i voi e o ai capît dal moment cui che e jere chê presince misteriose: une civuite.

Sgjavâ e mangjâ di buinore a sere

In chest gnûf an mi plasarès dedicâmi, di là des contis sui lûcs di visitâ, ancje aes piçulis storiis di personis, plantis e animâi di chest teritori che, ancje se in aparence banâi, a scuindin aspiets curiôs, stramps e cualchi volte inspietâts. Tra lis tantis besteutis che a vivin tal nestri teritori e che da râr o degnìn di une cjalade (in chest câs viodilu al è cuasi impussibil), o ai sielt di contâ cualchi curiositât sul farc.