Etologjie

[ Blog ]

Gno fradi, il salvadi

Cualchi dì indaûr, intant che o fevelavi cun mê sûr, jê mi à fate une domande: “Ma il gjat salvadi, esistial?”. A pensâi ben, no crôt che la cussience de realtât di chest animâl e sedi cussì pandude. Tantis voltis o pensi che al puedi soreponisi ae imagjin di un gjat “vagabont” o “insalvadeît”. E pûr, chest animâl enigmatic al è reâl, ancje se pardabon pôcs di lôr a puedin dî di vêlu viodût.
[ Blog ]

Ospits no invidâts: il cuc

Par furlan e esist une espression pôc cortesane par descrivi un om che al va a vivi inte cjase di proprietât de compagne: “Al è cuc!” (chest le dîs dute sul mût di viodi la cubie inte nestre tradizion...). Ce vuelie dî in realtât cheste espression? Dut al ven dal fat che i cucs – cemût che tancj di voaltris a savaran – no àn un nît lôr, ma a cjapin chel di altris speciis.
[ Blog ]

Piçule vuide pal no socors

Se, tant che mi sucêt a mi, o patîs di un istint che no podês stratignî e che us puarte a volê socori ogni singul animâl che al pâr in dificoltât, o volarès dâus cualchi piçul consei, che jo stesse o varès volût vê cualchi desene di agns indaûr e che mi varès permetût di sconzurâ une vore di piçui dramis domestics.
[ Blog ]

I dîs de civuite

Cualchi timp indaûr o jeri daûr a tornâ cjase sot sere, in chel moment precîs de zornade, subit dopo che il soreli al è lât a mont, li che dutis lis robis (arbui, cjasis, monts...) a pierdin la lôr fate tridimensionâl e si trasformin in profîi neris suntun fonts celest intens. Propit in chel moment, daûr di me, o ai olmât une forme che di un pâl de alte tension e leve jù cuasi fin par tiere, par dopo movisi in bande e tornâ a lâ sù sul fumarûl di une cjase dongje. O ai alçât i voi e o ai capît dal moment cui che e jere chê presince misteriose: une civuite.
[ Blog ]

Sgjavâ e mangjâ di buinore a sere

In chest gnûf an mi plasarès dedicâmi, di là des contis sui lûcs di visitâ, ancje aes piçulis storiis di personis, plantis e animâi di chest teritori che, ancje se in aparence banâi, a scuindin aspiets curiôs, stramps e cualchi volte inspietâts. Tra lis tantis besteutis che a vivin tal nestri teritori e che da râr o degnìn di une cjalade (in chest câs viodilu al è cuasi impussibil), o ai sielt di contâ cualchi curiositât sul farc.